• 🇦🇪 06:38 PM | 11 Sep, 2026
• 🇮🇳 08:08 PM | 11 Sep, 2026

• Advertise with Us
• About Us
• Contact Us

Tag Archive: gcc

1. യുഎഇയില്‍ ബലി പെരുന്നാള്‍ അവധി പ്രഖ്യാപിച്ചു

   May 13, 2026 1:02 am Leave a Comment

   യുഎഇയിലെ സർക്കാർ ജീവനക്കാർക്കുള്ള ഈദ് അൽ അദ്ഹ (ബലിപെരുന്നാൾ) അവധി ദിനങ്ങൾ പ്രഖ്യാപിച്ചു. ഇത്തവണ പൊതുമേഖലാ സ്ഥാപനങ്ങളിലെ ജീവനക്കാർക്ക് 5 ദിവസത്തെ അവധിയാണ് ലഭിക്കുക.

   ഫെഡറൽ അതോറിറ്റി ഫോർ ഗവൺമെന്റ് ഹ്യൂമൻ റിസോഴ്‌സ് പുറത്തിറക്കിയ പ്രസ്താവന പ്രകാരം, 2026 മെയ് 25 തിങ്കൾ മുതൽ മെയ് 29 വെള്ളി വരെ ആയിരിക്കും അവധി.

   ---

   പ്രധാന വിവരങ്ങൾ:

   • അറഫാ ദിനം: ഹജ്ജ് കർമ്മത്തിലെ ഏറ്റവും പ്രധാനപ്പെട്ടതും ആത്മീയ പ്രാധാന്യമുള്ളതുമായ അറഫാ ദിനം മെയ് 26 ചൊവ്വാഴ്ച ആയിരിക്കും.
   • ബലിപെരുന്നാൾ: ഷാർജ അസ്‌ട്രോണമി അക്കാദമിയുടെ കണക്കുകൂട്ടൽ പ്രകാരം മെയ് 27 ബുധനാഴ്ച ബലിപെരുന്നാളിന്റെ ആദ്യ ദിനമാകാൻ സാധ്യതയുണ്ട്.
   • അവധി കാലയളവ്: മെയ് 25 തിങ്കളാഴ്ച ആരംഭിച്ച് മെയ് 29 വെള്ളിയാഴ്ച അവസാനിക്കുന്ന രീതിയിലാണ് അവധി ക്രമീകരിച്ചിരിക്കുന്നത്. ശനി, ഞായർ വാരാന്ത്യ അവധി കൂടി ചേരുമ്പോൾ ജീവനക്കാർക്ക് ദീർഘമായ ഒരു വിശ്രമവേള ലഭിക്കും.

   ---

   തീയതി നിർണ്ണയിക്കുന്നത് എങ്ങനെ?

   ഇസ്‌ലാമിക കലണ്ടറിലെ ദുൽ ഹജ്ജ് മാസം 9-ാം തീയതിയാണ് അറഫാ ദിനം. ഇതിനെത്തുടർന്നാണ് മൂന്ന് ദിവസത്തെ ഈദ് ആഘോഷങ്ങൾ നടക്കുന്നത്. ചന്ദ്രമാസ കലണ്ടർ ആയതിനാൽ മാസപ്പിറവി ദർശിക്കുന്നതിനനുസരിച്ച് തീയതികളിൽ മാറ്റം വരാം.

   ജ്യോതിശാസ്ത്ര കണക്കുകൾ പ്രകാരം:

   • മെയ് 17 ഞായറാഴ്ച മാസപ്പിറവി ദൃശ്യമായാൽ, ദുൽ ഹജ്ജ് മാസം മെയ് 18 തിങ്കളാഴ്ച ആരംഭിക്കും.
   • ചന്ദ്രനെ കാണാൻ സാധിച്ചില്ലെങ്കിൽ, മെയ് 19 ചൊവ്വാഴ്ചയായിരിക്കും മാസം ആരംഭിക്കുന്നത്.

   ഇതനുസരിച്ചായിരിക്കും അറഫാ ദിനവും പെരുന്നാളും ഔദ്യോഗികമായി നിശ്ചയിക്കപ്പെടുക. ലോകമെമ്പാടുമുള്ള ദശലക്ഷക്കണക്കിന് മുസ്ലീങ്ങൾ മക്കയിൽ ഹജ്ജ് കർമ്മം നിർവ്വഹിക്കുന്ന സമയത്താണ് ഈദ് അൽ അദ്ഹ ആഘോഷിക്കുന്നത്.

2. എത്തിഹാദ് പാസഞ്ചർ ട്രെയിൻ,ആദ്യ റൂട്ട് പ്രഖ്യാപിച്ചു

   January 22, 2026 3:21 pm Leave a Comment

   അബുദബി: യുഎഇയില്‍ എത്തിഹാദ് പാസഞ്ചര്‍ ട്രെയിന്‍ സര്‍വീസ് ആരംഭിക്കാനിരിക്കെ ആദ്യ റൂട്ട് പ്രഖ്യാപിച്ചു. അബുദബിയില്‍ നിന്ന് ദുബായ് വഴി ഫുജൈറയിലേക്കാണ് ആദ്യ യാത്ര. അബുദബിയില്‍ നിന്ന് 50 മിനിറ്റ് കൊണ്ട് ദുബൈയിലും ഒന്നര മണിക്കൂര്‍ കൊണ്ട് ഫുജൈറയിലും എത്താം. അബുദബിയില്‍ നിന്ന് ദുബൈയിലേക്ക് പലപ്പോഴും ഒന്നര മുതല്‍ രണ്ട് മണിക്കൂര്‍ വരെ റോഡ് വഴിയുള്ള യാത്രയ്ക്ക് സമയമെടുക്കാറുണ്ട്. മരുഭൂമിയും മലകളും തുടങ്ങി വിശാലമായ ഭൂപ്രകൃതി ആസ്വദിച്ച് എത്തിഹാദില്‍ യാത്ര ചെയ്യാം.

   ചാര്‍ജ്ജിങ് പോയിന്റുകള്‍, വൈഫൈ സൗകര്യം, ഇന്‍ഫോടൈന്‍മെന്റ് സിസ്റ്റം, പ്രാര്‍ഥന മുറികള്‍ എന്നിവ ട്രെയിനില്‍ ലഭ്യമാക്കിയിട്ടുണ്ട്. മണിക്കൂറില്‍ 200 കിലോമീറ്ററാണ് വേഗത. ഒരു ട്രെയിനില്‍ 400 പേര്‍ക്ക് യാത്ര ചെയ്യാം. ഫസ്റ്റ്, ബിസിനസ്, ഇക്കോണമി എന്നിങ്ങനെ ക്ലാസുകളായി തരം തിരിച്ചിട്ടുണ്ട്. ടിക്കറ്റ് നിരക്ക് സംബന്ധിച്ച് ഉടന്‍ പ്രഖ്യാപനം ഉണ്ടാകും.

   ആദ്യ ഘട്ടത്തില്‍ മൂന്ന് സ്റ്റേഷനുകളാണ് ഉണ്ടാവുക: അബുദബി മുഹമ്മദ് ബിന്‍ സായിദ് സിറ്റി, ദുബൈ ജുമൈറ ഗോള്‍ഫ് എസ്റ്റേറ്റ്, ഫുജൈറ സകംകം എന്നീ സ്റ്റേഷനുകളാണ് സജ്ജമായിട്ടുള്ളത്. മുസഫയില്‍ ഡല്‍മ മാളിന് എതിര്‍വശത്താണ് അബുദബിയിലെ സ്റ്റേഷന്‍. യാത്രക്കാരുടെ എണ്ണവും ആവശ്യവും കൂടുന്നതിന് അനുസരിച്ച് സ്റ്റേഷനുകളുടെ എണ്ണം വര്‍ധിപ്പിക്കും. വര്‍ഷത്തില്‍ ഒരു കോടി യാത്രക്കാരെയാണ് ലക്ഷ്യമിടുന്നത്. 2023 ല്‍ എത്തിഹാദ് ചരക്ക് ഗതാഗതം സര്‍വീസ് ആരംഭിച്ചിട്ടുണ്ട്. അടുത്ത ഘട്ടങ്ങളിൽ രാജ്യത്തെ എല്ലാ എമിറേറ്റുകളുമായും പാസഞ്ചര്‍ ട്രെയിന്‍ ബന്ധിപ്പിക്കും.

3. അന്റാർട്ടിക്കയിലെ ഏറ്റവും ഉയർന്ന കൊടുമുടി കീഴടക്കി 18-കാരി; ചരിത്രം കുറിച്ച് എമിറാത്തി പെൺകുട്ടി ഫാത്തിമ

   January 12, 2026 2:43 pm Leave a Comment

   അബുദാബി: ലോകത്തിന്റെ നെറുകയിൽ യുഎഇയുടെ പതാക പാറിച്ച് പതിനെട്ടുകാരിയായ ഫാത്തിമ അബ്ദുൽറഹ്മാൻ അൽ അവദി ചരിത്രം കുറിച്ചു. അന്റാർട്ടിക്കയിലെ ഏറ്റവും ഉയർന്ന കൊടുമുടിയായ മൗണ്ട് വിൻസൺ (Mount Vinson) കീഴടക്കുന്ന ഏറ്റവും പ്രായം കുറഞ്ഞ പർവതാരോഹകയും ആദ്യത്തെ അറബ് വനിതയുമായാണ് ഫാത്തിമ . 2026 ജനുവരി 6 ചൊവ്വാഴ്ചയായിരുന്നു ഈ അഭിമാന നേട്ടം.

   സമുദ്രനിരപ്പിൽ നിന്ന് 4,892 മീറ്റർ ഉയരമുള്ള മൗണ്ട് വിൻസൺ കീഴടക്കിയതോടെ, ലോകത്തിലെ ഏഴ് ഭൂഖണ്ഡങ്ങളിലെയും ഏറ്റവും ഉയർന്ന കൊടുമുടികൾ കീഴടക്കുക എന്ന ‘സെവൻ സമ്മിറ്റ്‌സ്’ (Seven Summits) ലക്ഷ്യത്തിലേക്കുള്ള മൂന്നാമത്തെ വലിയ ചുവടുവെപ്പാണ് ഫാത്തിമ പൂർത്തിയാക്കിയത്.

   മൈനസ് 40 ഡിഗ്രി സെൽഷ്യസിലും താഴെ പോകുന്ന അതികഠിനമായ തണുപ്പും, ശക്തമായ കാറ്റും നിറഞ്ഞ ലോകത്തിലെ ഏറ്റവും ദുർഘടമായ സാഹചര്യങ്ങളിലൂടെയായിരുന്നു ഫാത്തിമയുടെ പര്യവേഷണം. ശാരീരികവും മാനസികവുമായ കരുത്ത് പരീക്ഷിക്കപ്പെട്ട ഈ യാത്ര മൂന്നാഴ്ചയോളം നീണ്ടുനിന്നു.

   “മൗണ്ട് വിൻസൺ എനിക്ക് വലിയൊരു പാഠമായിരുന്നു. കൊടും തണുപ്പും ഏകാന്തതയും നിറഞ്ഞ ആ പർവതം ആദ്യം എന്നെ ഭയപ്പെടുത്തിയിരുന്നു. എന്നാൽ മുകളിൽ എത്തി താഴേക്ക് നോക്കിയപ്പോൾ, ആ കൊടുമുടി എന്നെ തളർത്തുകയല്ല, മറിച്ച് കൂടുതൽ കരുത്തുള്ളവളാക്കുകയാണ് ചെയ്തതെന്ന് ഞാൻ തിരിച്ചറിഞ്ഞു,” ഫാത്തിമ തന്റെ അനുഭവത്തെക്കുറിച്ച് പറഞ്ഞു.

   സമർപ്പണം

   തന്റെ ഈ വലിയ നേട്ടം യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനും, ‘രാഷ്ട്രമാതാവ്’ ഷെയ്ഖ ഫാത്തിമ ബിൻത് മുബാറക്കിനുമാണ് ഫാത്തിമ സമർപ്പിച്ചത്. എമിറാത്തി യുവത്വത്തിനും സ്ത്രീകൾക്കും രാജ്യം നൽകുന്ന വലിയ പിന്തുണയ്ക്കുള്ള നന്ദിയാണിതെന്ന് താരം കൂട്ടിച്ചേർത്തു.

   

   ലക്ഷ്യം ‘എക്സ്‌പ്ലോറേഴ്സ് ഗ്രാൻഡ് സ്ലാം’

   നിലവിൽ ഇക്കണോമിക്സ് വിദ്യാർത്ഥിനിയായ ഫാത്തിമ, പഠനത്തോടൊപ്പം തന്നെ പർവതാരോഹണത്തെയും കൊണ്ടുപോകുന്നു. 2025 ജൂലൈയിൽ യൂറോപ്പിലെ ഏറ്റവും ഉയർന്ന കൊടുമുടിയായ മൗണ്ട് എൽബ്രസ് (5,642 മീറ്റർ) കീഴടക്കിയും ഫാത്തിമ ശ്രദ്ധ നേടിയിരുന്നു. ഏഴ് കൊടുമുടികളും ഉത്തര-ദക്ഷിണ ധ്രുവങ്ങളും കീഴടക്കുന്ന ‘എക്സ്‌പ്ലോറേഴ്സ് ഗ്രാൻഡ് സ്ലാം’ (Explorer’s Grand Slam) പൂർത്തിയാക്കുകയാണ് ഈ യുവതിയുടെ അടുത്ത ലക്ഷ്യം.

   പാം സ്‌പോർട്‌സ് (Palms Sports), ദാർ അൽ തകാഫുൾ ഫിനാൻസ് എന്നീ സ്ഥാപനങ്ങളാണ് ഫാത്തിമയുടെ ഈ ചരിത്രയാത്രയ്ക്ക് സ്പോൺസർഷിപ്പ് നൽകിയത്.

4. ദുബൈയിൽ ഡ്രൈവറില്ലാ വാഹനങ്ങൾ നിരത്തുകളിൽ

   September 26, 2025 4:18 pm Leave a Comment

   ദുബായ്: ദുബൈയുടെ ഗതാഗത മേഖലയിൽ വിപ്ലവം സൃഷ്ടിച്ചുകൊണ്ട്, ഡ്രൈവറില്ലാ വാഹനങ്ങൾ പരീക്ഷണയോട്ടത്തിനായി പൊതുനിരത്തുകളിൽ ഇറങ്ങും. പരീക്ഷണയോട്ടം നടത്താൻ മൂന്ന് ടെക് കമ്പനികൾക്ക് ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) അനുമതി നൽകി. ചൈനീസ് കമ്പനികളായ ബെയ്ദുവിന്റെ ‘അപ്പോളോ ഗോ’, ‘വിറൈഡ്’, ‘പോണി.എഐ’ എന്നിവയാണ് ദുബായ് നഗരത്തിൻ്റെ റോഡുകളിൽ റോബോ-ടാക്സികളുടെ പരീക്ഷണയോട്ടം ആരംഭിക്കുന്ന ആദ്യ കമ്പനികൾ.

   ഈ നീക്കം ദുബായിയുടെ പൊതുഗതാഗത സംവിധാനത്തിന് ഒരു പുതിയ മാനം നൽകുമെന്ന് ആർടിഎ വ്യക്തമാക്കി. ദുബായിലെ പ്രാദേശിക സാഹചര്യങ്ങളുമായി ഓട്ടോണമസ് വാഹനങ്ങൾ എത്രത്തോളം അനുയോജ്യമാണെന്ന് ഉറപ്പാക്കാനുള്ള പരീക്ഷണ പ്രവർത്തനങ്ങളാണ് നടക്കുക.

   2030 ഓടെ 25% വാഹനങ്ങളും ഓട്ടോണമസ് ആകും

   2030 ആകുമ്പോഴേക്കും ദുബായിലെ മൊത്തം യാത്രകളിൽ 25 ശതമാനവും ഡ്രൈവറില്ലാ ഗതാഗത സംവിധാനങ്ങളിലൂടെയാക്കി മാറ്റുമെന്ന് ആർടിഎ അറിയിച്ചു. ദുബായിൽ ഓട്ടോണമസ് ടാക്സി സർവീസുകളും സാധ്യമാക്കും. ഇതിനായി ആർടിഎയുടെ റോഡ്മാപ്പ് നിർ‌മ്മാണത്തിനായുള്ള പ്രവർത്തനങ്ങൾ ആരംഭിച്ചു. ദുബായിയുടെ ‘സ്മാർട്ട് സെൽഫ് ഡ്രൈവിംഗ് ട്രാൻസ്‌പോർട്ട് സ്ട്രാറ്റജി’യുടെ നിർണായക ചുവടുവെയ്പ്പിന്റെ ഭാ​ഗമാണിത്. ലോകത്തിലെ ഏറ്റവും നൂതനമായ നഗരങ്ങളിലൊന്നായി ദുബായ് മാറുന്നതിൻ്റെ സൂചന കൂടിയാണ് ഗതാഗത മേഖലയിലെ ഈ ദ്രുതഗതിയിലുള്ള മുന്നേറ്റം. സുരക്ഷിതവും സുസ്ഥിരവുമായ ഗതാഗത സൗകര്യങ്ങൾ ഒരുക്കുന്നതിൽ ദുബായ് ലോകത്തിന് തന്നെ മാതൃകയാവുകയാണ്.